Free ebook!

Hinugpung ebook (pdf)


Download here if you want a copy of the book. Pls leave me a comment if the link doesnt work.

Limut Hin Hinigugma

ni Patricio R. Tualla

(Kan T. L. P., Palu)


Masakit gud panumdumun,
an gugma kun paglimutun,
kay daw tunuk nga basuni,
ha kasingkasing ku makuri.

Asay padaw kun mamatay,
inin lawas ku pati dagway,
bis' itu nga buhipa aku,
linilimutna aku nimu...

Sanglit kay diri katpung,
hadtun imu pamahungpahung,
imu nala pinakakalimutan,
hin kalimut nga kadayunan.

Igaampu ku manla gihapun,
ha kan Bathala nga maluluy-uy,
kay man-gad na im' ak' hinumduman,
ha mamingaw mu nga higdaan.

Natangis gud aku dayun,
kun ak' pinanmamalandung,
kay an mga saad ku kanugun,
kun diri mu patudkun.

Gintanum ku hin agahay,
kay basi bumukad hin kalipay,
lugaring kay ini tinalikdan,
namukad hin kasakitan.


Takluban, Marsu 1910

-------------------------------------------
Tikang han libro:
Hinugpung: Mga Siday, Garaygaday, Titiguhun, Liaw-Libang, Diwata
Tinipun ni Dr. Vicente I. de Veyra, Disyimbri, 1914

Ha Kan Monsenor Singzon

Bonum certamen certavi,
(Tim. Epistola 3, V. 7)
ni Norberto Romualdez


Iini kami mahal nga Obispo,
Nagtipun pagdayaw pag-urug ha iyu,
Tagan kamu unta han Diyus nga hitaas,
Maupay nga adlaw, malipay nga uras.

Dara han pagrayhak, dara han himaya,
Nga adtun paghingyap namukad, namunga,
Niyan an magbugtu nga Samay ug Layti,
Naguliat: BONUM CERTAMEN CERTAVI.

Iini kami, talahurun namun,
Amay nga gintungdan han pagkakalagnun,
Daak ka kilala, daan higugmaun,
Kay bukad nga turuk hinin tuna natun.

Ngan tungud hini nga imu kahimtang,
An amun kalipay labi nga nadugang,
Salit igpasaylu nga di' ka pag-alngan,
Hin paghimangrawi ha atun yinaknan.

Daku nga parabul nga kanan Diyus hatag,
Nga ikaw ha amun asay makag-agak,
Sanglit dayawun ta an Diyus ha hitaas,
Ug ha Santo Papa damu nga salamat.

Salamat Harangdun, Mahal Delegado,
Kay ikaw binmulig nga ini mahimu,
Ikaw an tagdara hadtun karig unan,
Diin an Obispo namun gintutungdan.

Kun mahimu kunta nga niyan matiruk,
An anyag ngatanan han bukad ug hamut,
Akun pupuyungun ug bawbaw ha palad,
Ha mga Obispos akun ihahalad.

Kun mahimu kunta nga magkaduruyug,
An huni han tamsi ha bukid, ha walug,
Akun tatawagun basi magpakanhi,
Nga kumanta: BONUM CERTAMEN CERTAVI.

Ambut daw kun angay nga am' igpahayag,
Daku nga tinguha ug hingyap han kalag,
Amun igsasarit ha mga Samarnun,
Nga dinhi ka unta pagpuyu ha amun.

Diri pakigsupil inin amun tuyu,
Kay an Samar Layti mag usa, magbugtu,
An Samar, palaran, didtu ka himugsu,
Ta, dinhi ha amun naman pakidtampu.
Diri man liwat in amun pagriwa,
Han labaw nga sugu han Papa ha Roma,
Pagpahayag namun, pagmugu ugaring,
Han buhi nga tuyu hinin kasingkasing.
Sanglit bisan hain ma Samar ma Layti,
An imu puruy-an, ma adtu ma anhi,
Malipay ginhapun, maguliat kami,
Pagsiring nga: BONUM CERTAMEN CERTAVI.

Kundi pastilan daw, kun pasasagdan la,
An kusug han sulug han amun higugma,
Amun igsasarit ha mga Samarnun,
Nga dinhi ka unta pagpuyu ha amun.
Tikus an paglaum hinin hunahuna,
Nga inin paghingyap mabukad, mabunga,
Hinaut pa unta makasiring kami,
Ha urhi nga: BONUM CERTAMEN CERTAVI.

-------------------------------
Tikang han libro:
Hinugpung: Mga Siday, Garaygaday, Titiguhun, Liaw-Libang, Diwata
Tinipun ni Dr. Vicente I. de Veyra, Disyimbri, 1914

Hinamdum Ku

ni Manuel Avelino

Masirumsirumpa adtu,
adtun kaagahun,
nga ak' ibinaya,
tuna lugaringun,
duyug an kasakit,
pati kabiduun,
kay matalikudna,
Miling nga hinandum.

Ha ak' paglalaktan,
dara an kasakit,
bilin an kalipay,
ha imu hamili,
an mga agi an,
tugub hin ka sigpit,
bisan kun mapawa,
masirum an langit.

Miling pagtawag,
hadtun imu ngaran,
ngaran nga pinili,
akun inugayan,
inugan ta ikaw,
sugad hin tanaman,
tanaman han gugma,
hin gugma hinalaran.

Hi ikaw an Miling,
nga kalundiisun,
bukad nga minamat,
anak han Burawun,
ha Burawun nga bungtu,
hi ikaw gintanum,
nga niyan binmunga,
hiyum nga langitnun.


(Burawun, Mayu, 1910)

------------------------------
Tikang han libro:
Hinugpung: Mga Siday, Garaygaday, Titiguhun, Liaw-Libang, Diwata
Tinipun ni Dr. Vicente I. de Veyra, Disyimbri, 1914

Ikaw Ngan Aku*

ni Iluminado Lucente

Bukad nga biyuus, marol nga maamyun,
matam-is nga lagdu, matugnaw nga pawa,
tubig nga malinaw, burabud han lipay,
langitnun nga bata, tugub hin kahusay:
Amu ikaw.

Dahun nga marakdag, han hangin mulayan,
kangingking nga baya, butang nga tinamay,
gab-i nga mangitngit, waray gud bituun,
sighut nga sinampig, rugtab nga balagun:
Amu ikaw.

Hi ikaw an sulhug, aku an lambung,
akun an katungkan, imu an himaya,
amu ka an bulan nga waray katunud,
aku an dalumdum kay aku an dampug.
An langit ikaw.

*Karantahun. Laylay kan Gu. Silvestre Tapales.

------------------------------
Tikang han libro:
Hinugpung: Mga Siday, Garaygaday, Titiguhun, Liaw-Libang, Diwata
Tinipun ni Dr. Vicente I. de Veyra, Disyimbri, 1914

Pasurapu Ha Fenix Ug Kaluwasan

ni H. T. Lagera

FENIX KALUWASAN bag-u ka nga sirang
Bungtu nga Takluban na imu ginmat-an
Waray ka pagturaw, waray ka pag-alang,
Bangin mu dangatun adtun kahiladman.

Hilarum nga linaw imu gud paglikyan,
Kay didtu kalunud imu kabugtuan;
Kun ikaw hangadtu hadtun kaliruan,
Di' na mababanhaw FENIX KALUWASAN.

Mabangis nga baha ha ira nag anud,
Dinangpan hin hungin uran nga makusug,
Bagyu nga inmabut may' upud nga sulug;
Tikang ha iraya nag tipalawud.

Kadaman-an nga tawu nanagpaturiyan,
Waray may' binmugsay waray may' tinmimbang;
Diri ta man sidngun nga nangangaturug,
Kay hira nakita nga gin aanud.

Timunil, Pilutu an nag agang-agang,
Nga diri sangputun adtun kasalaran,
Mayada hinmulig nga baga talagsa,
Kundi an pagbulig baga ruhaduha.

Di' ku ig aasuy ira mga ngaran,
Kay bangin maalu dinhi ha kadam-an,
Ngan bangin sumiring nga aku mayakan,
Ug an ira lawas akun gin laladngan.

Ha urhi nga adlaw hibabaruan mu;
Adtun mga ngaran mga apilyidu,
Kadam'an nga tawu masakay ha imu,
Diri gud masayup nga kikilal-un mu.

Ayaw pakasiring nga aku maaram,
Diri kay pagtutdu di' man kay paglarang,
Itun imu gahum nagn han kinaadman,
Di' ku matutugkad adtun kahiladman.

Inin akun pulung kun imu tipigan,
Bangin daw ha urhi may' imu pagpulsan,
Kay ini an bulung han mga batasan,
Nga diri napaid hadtun kasakitan.

FENIX KALUWASAN kahuy ka nga marampag,
Akun minayuyu imu mga bukad,
Gamut, lawas, sanga, akun ihahalad,
Nga ikaw mangugbus hin waray paglubad.

Bisan kun laya na itun imu dahun,
Diri mu itugyan hadtun didtuanun;
Kay an saadsaad, waray paghinayun;
Tamsi nga agila an imu hulatun.


(Manila, K.P.)


------------------------------
Tikang han libro:
Hinugpung: Mga Siday, Garaygaday, Titiguhun, Liaw-Libang, Diwata
Tinipun ni Dr. Vicente I. de Veyra, Disyimbri, 1914

Ha Kan "Esencia De Rosa"

ni Fredes V. Bautista, 1911

Ayaw ha ak kabidu,
ngan di' sadang usahun,
U! , akun anay hadtu,
bukad nga higugmaun;
kun an akun pangasuy,
maaslum pamatiun,
sadang mu igpasaylu,
kay pulung hin kasamdung.

Han hi kita magsituy,
hadtu nga mga adlaw,
inaru mu ha akun,
higugma ku nga puraw;
ngan imu iginsumpa,
an uray nga himaya,
han atun kasingkasing,
ha bawbaw hinin tuna.

Itu nga imu saad,
ha agtang gintipigan,
ha dughan ginmayuyu,
han akun kalipayan;
waray gud ak' magtahap,
nga imu kakawangun,
gub-un adtun sarabut,
bas' nim' aku linguun?

Waray aku panumdum,
nga maabut an adlaw,
an sumpa ngan an saad,
hingyap mu nga matunaw,
balika hin pagsiplat,
adtun nga kalipay,
adtun nga himaya...
,,,magtam-is nga harukay!

Ayaw gad hikalimti,
an akun mga ugay,
haruk ku nga batan-un
ha imu mga kirayl
waray kana panumdum,
hin sugad nga kalipay,
anu an nakasugad...
ha akun nim' pagpatay?

Maraut ku nga palad,
waray kahimayaan,
halaran ka hin gugma,
im' dayun babayaan;
haruk nakun kasanhi,
layun mu igintubyan,
ha lainnga lalaki,
ha im-um nga kadaman.

Kay akun kapalaran,
sadang ku pag-ilubun,
dad-un ku an im lingu,
ngadtu ha kamatayun,
ayaw man hikalimti,
nga putli an higugma,
nga imu ginliwanan,
hadtun iba nga gugma.

Maada ka ha butnga,
hin dagku nga kalipay,
tupad han kasangkayan,
ayaw aku isikway,
ayaw aku Esencia,
pagtagi hin kasadung,
puuyun aku nimu,
hadtun imo panhiyum.

Buhata an kahimyang,
ha imu higugmaun,
nga imu iginliwan,
bas' mu aku limutun,
waray nakun paghingyap,
nga mu bubuhatun,
an daky nga paglingu...
...sugarun mu ha akun!

Sanglit ayaw pagtapud,
hit' imu kamahusay...
kun im' gihap' dayunun,
batasan nga tinamay,
Esencia nga linipas,
waray, kana alimyun,
waray muna kaanyag,
laya an im' panhiyum.


Dulag, Hulyu 8, 1911

-----------------
Tikang han libro:
Hinugpung: Mga Siday, Garaygaday, Titiguhun, Liaw-Libang, Diwata
Tinipun ni Dr. Vicente I. de Veyra, Disyimbri, 1914

An Kaagahun

(Ha akun hinasa nga sangkay Gu. Vicente I. de Veyra)
ni Francisco H. Baltazar


Makalilipay hinin nga panahun,
ak' kasangkayan ngatanan maglipayun,
kahuy, kadagatan mag-upay tanawun,
ngatanan an tamsi sahid magawitun.

Tugauk han manuk malanuy batium,
libang han kamingaw han ak' higugmaun,
amu an pagtikang han iya pagbangun,
didtu han higdaan nga akun taran-awun.

Sidlit han bituun upud an paglaum,
tambal han kasakit nga akun ginhiyum,
maghamut nga bukad sarang an alimyun,
bulung han kamingaw dughan masulub-un.

Anu pala ngay an kay dit' ha sidlangan,
tikang han kapara gabi nga gamhanan,
inin kalibutan hiya malipayun,
kay pagdangat na ngay-an, bag-u nga kaagahun.

Sanglit mga maya tikang hin pagkalpad,
mga alibangbang panlauy han bukad,
ngatanan malipay waray kasakitan,
libang han paghayhay hinin panumduman.

Nagtikangna mga manuk panhugdun,
ngatanan an tawu sahid malipayun,
huni hinin tamsi sukut nak' batiun,
kay ira pagduaw hinin kaagahun.


(Takluban, Disyimbri 8, 1907)

-------------------------------
Tikang han libro:
Hinugpung: Mga Siday, Garaygaday, Titiguhun, Liaw-Libang, Diwata
Tinipun ni Dr. Vicente I. de Veyra, Disyimbri, 1914